पत्र पत्रिका बाट -साभार http://kantipur.ekantipur.com/news/2017-09-15/20170915175943.html
- 'अब विदेश नजाने निधो गरेको छु' - , ज्यामिरे (ओखलढुंगा)
अकबरे खुर्सानीबारीमा तेजनारायण श्रेष्ठ । तस्बिर: कुम्भराज/कान्तिपुर ।
भाद्र ३०, २०७४-
सिद्धिचरण
नगरपालिका–५, ज्यामिरेका एक युवाले मल्चिङ प्रविधिबाट अकबरे खेती गरेर
मनग्गे आम्दानी गर्न थालेका छन् । ३० वर्षीय तेजनारायण श्रेष्ठले मासिक १
लाख ६० हजारसम्मको अकबरे खुर्सानी बेचिरहेका छन् ।
‘हप्तामा ४० हजारको बिक्रि हुन्छ’ तेजनारायणले भने,
‘प्रतिकेजी २ सयले सदरमुकाममै बिक्रि गर्छु । मैले हप्तामा २ सय किलोसम्म
टिपेर बेच्ने गर्छु ।’ मल्चिङ प्रविधिबाट व्यावसायिक अकबरे खेती शुरु गर्ने
उनी जिल्लाकै पहिलो कृषक हुन् । उनले खुर्सानी मात्र नभएर यो प्रविधिबाट
रायोको साग, बोडी, आलु, टमाटर, भेंडे खुर्सानीमासमेत अभ्यास गरिसकेका छन् ।
माटोको ड्याङ बनाई मल्चिङ प्लाष्टिक भित्र बेर्ना रोपेर
गरिने यो खेती विकसित मुलुकमा सफल खेती प्रणाली मानिन्छ । खुल्ला प्रविधि
भन्दा यसले उत्पादन तेब्बर दिने र कम परिश्रम गर्नुपर्ने भएकोले सजिलो भएको
तेजनारायणले बताए । मल्चिङ प्लाष्टिकको कारणले फेदमा धेरै झार नउम्रिने,
गोडमेल गर्नु नपर्ने भएकोले यो प्रविधि सजिलो भएको उनको भनाई छ ।
मल्चिङ प्रविधिबाट रोपिएको अकबरे खुर्सानीको बोट ।
उनले जम्मा ११ रोपनीमा १ हजार ३ सय बोट स्थानीय अकबरेको
बेर्ना रोपेका थिए । त्यसमध्ये ९ रोपनी जतिमा १ हजार २ सय बोटले उत्पादन
दिएको छ । पाकेर रातो भएको खुर्सानी मात्र उनले टिपेर बिक्रि गर्ने गरेका
छन् । परिश्रम बाहेक नगद २ लाख लगानी गरेर शुरु गरेको यस खेतीबाट उत्पादन
शुरु भएको तीन महिनामै लगानी उठेको श्रेष्ठले बताए ।
रोजगारीका लागि दुईपटक कतार र एकपटक मलेसिया गरि सात वर्ष
विदेशमा बिताएका उनले घर फर्केर यो खेती शुरु गरेका हुन् । उनलाई हाल बुवा,
आमा, भाई र बहिनीले समेत सहयोग गरेका छन् । भाई र उनी दैनिक ६ घण्टासम्म
खेतीमा खटिने गर्छन् । वर्षामा आकाशे पानी संकलन गरि सिंचाई गर्ने गरेका
छन् । हिउँदमा पिउने पानीसमेत अभाव हुने ज्यामिरेमा गाडीबाट ड्रममा पानी
बोकेर समेत सिंचाई गर्ने गर्छन् ।
तेजनारायाणका बुवा हेमनारायण र आमा इन्द्रकुमारी पहिले यही
जग्गा जमिनमा कोदो मकै लगाउने गर्थे । नगद पैसाका लागि बुवाले काठको काम
गर्न हिँड्नु पर्थ्यो । तर अहिले त्यो समस्या समाधान भएको छ । ‘परम्परागत
खेतीसँग त अहिलेको आम्दानी तुलनै गर्न सकिन्न’ उनले भने, ‘अब विदेश नजाने
निधो गरेको छु । अरु जान खोज्नेलाई पनि नजान अनुरोध गर्छु ।’
उनलाई कसैले यो प्रविधि सिकाएको होइन । इन्टरनेटको
माध्यमबाट कोरिया, जापानमा मल्चिङ खेती हेरेर शुरु गरेका हुन् । शुरुमा
गाउँले मात्र नभएर बुवाआमाले समेत उनलाई गाली गरेका थिए । तर, उत्पादन दिन
थालेपछि भने सबैले विश्वास गरे । एउटा खुर्सानीको बोटले दुईवर्षसम्म
उत्पादन दिने भएकोले अन्य खेती यही प्रविधिबाट लगाउने तयारी उनको छ ।
उनले आफ्नो कान्छो भाईलाई कृषि जेटिए पढाईरहेका छन् ।
कसैको सहयोग बिना व्यक्तिगत पहलमा खेती शुरु गरेका उनलाई अहिले भने विभिन्न
संघ/संस्था र जिल्ला कृषिले समेत प्रोत्साहन दिने गरेको छ । मल्चिङ
प्रविधि बुझ्नका लागि किसानहरु आउने गरेका छन् ।
प्रकाशित: भाद्र ३०, २०७४
No comments:
Post a Comment