पूर्खा खोज्दै काभ्रेको नाला पुगेका प्रचण्डले गरे कुलदेवता पूजा

रामसुन्दर आचार्य

१० जेठ, काभ्रे । नेकपाका अध्यक्ष पुष्पकमल दाहाल प्रचण्ड बिहीबार काभ्रेको बनेपा नगरपालिका ३ नालामा आफ्नो पुर्खौली घर खोज्दै आइपुगे । आउँदा उनले वडा अध्यक्ष केपी दाहाललाई सोधे ‘यहाँ कुन कुन जातका मान्छे बस्छन् ?’
प्रचण्डले दाहालको अनुहारले नै चिनिने भन्दै आफू भने दाहाल एकतामा मात्रै नभएर देशभित्रका सबै जातजाति, धर्म, वर्गको एकताको महा अभियानमा रहेको बताए ।

‘मलाई साथ तमाम दाहाल परिवारको पनि चाहिन्छ’, उनले भने, ‘म राष्ट्र एकतावद्ध बनाउने, सृदृढ पार्ने आम जनताका पीडा र दुखलाई बिर्सन सक्ने अनुभूति हुने गरी एउटा अभियानमा छु ।’
प्रचण्डले आफ्नो परिवार दैलेखबाट नाला हुँदै कास्की पुगेको र चितवन झरेको प्रसंग उठाउँदै दाजुभाइ भेट्न पाउँदा खुशी लागेको बताए । ‘अहिले मैले यहाँ आए, कुलदेउताको पूजा पनि गरेँ, धेरै दाजुभाइ भेटें, कुनै जात धर्म विशेष भन्दा पनि त्यो भन्दा माथि उठेर काम गर्नुपर्छ’ उनले भने ।
पूर्खा र इतिहास बिर्सन नहुने भन्दै प्रचण्डले बन्धुत्व, भाइचारा नै वैज्ञानिक संस्कार भएको बताए । उनले दाहाल बन्धु अध्ययन प्रतिष्ठानको भवन उद्घाटन तथा बंशावली ग्रन्थ विमोचनसमेत गरे । प्रचण्डको स्वागतमा नालाका दाहालहरुले परम्परागत खैजडी भजन सुनाएर स्वागत र सम्मान गरेका थिए ।
प्रचण्डले नालाका दाहालहरुको चाहना अनुसार सडक आयोजना आउँदो बजेटमा पार्न प्रधानमन्त्री केपी शर्मा ओली र अर्थमन्त्री डा. युवराज खतिवडासँग कुराकानी गर्ने बताए ।
हेर्नुस् तस्वीरहरु :