भरतपुर अस्पतालमा डायलासिस सेवा

http://www.abhiyan.com.np/new/Articles/view/104052

२०७४-०५-१२ मा प्रकाशित     २८ पटक पढिएको    ० बिचार / प्रतिक्रिया

चितवन (अस) । भरतपुर अस्पतालमा आइतवारदेखि मिर्गाैलाको डायलासिस सेवा शुरू भएको छ । अस्पतालका मेडिकल सुपरिटेण्डेण्ट डा रुद्र मरासिनीका अनुसार धादिङ त्रिपुरासुन्दरी गाउँपालिका–१ की ६२ वर्षीया धनकुमारी थपलियाको पहिलो डायलासिस गरेर सेवाको शुभारम्भ गरिएको हो । अस्पतालमा १२ उपकरण रहेकाले एकैपटक १२ जनाको मिर्गौलाको डायलासिस गर्न सकिनेछ ।

मरासिनीका अनुसार सेवाका लागि ६ प्राविधिकले तालीम लिएर आइसकेका छन् । अन्य ६ जना तालीममा नै छन् । शुरूमा दुई चरणमा २४ जनाको डायलासिस गरिनेछ । थप प्राविधिक तालीम सकेर आएपछि दैनिक ३६ जनाको डायलासिस गरिने अस्पताल प्रशासनले बताएको छ ।

ती उपकरण सरकारले खरीद गरिदिएको हो भने अन्य व्यवस्थापन अस्पताल विकास समितिले गरेको हो । समितिका अध्यक्ष राजकुमार राजभण्डारीले बिरामीले दुःख पाएकाले यसअघिका स्वास्थ्यमन्त्री गगनकुमार थापासँग विशेष आग्रह गरेर बजेट निकासा गरी काम अघि बढाइएको बताए ।

जिल्लाका विभिन्न अस्पतालमा थोरै बिरामीको मात्र डायलासिस हुने गरेको छ । राजभण्डारीका अनुसार चितवनसहित छिमेकी जिल्लाका बिरामीलाई पनि सेवा दिन सकिनेछ । भरतपुरका दुई मेडिकल कलेजमा १४ र रत्ननगरको मिर्गौला रोग केन्द्रमा ६ ओटा मात्र उपकरण छन् ।

निजीक्षेत्रका मेडिकल कलेजमा उपकरण बिग्रिरहने समस्याका कारण बिरामीले सास्ती पाउँदै आएका बेला सरकारी अस्पतालमा नयाँ उपकरणसहित डायलायसिस सेवा शुरू भएपछि बिरामी लाभान्वित हुने भएका छन् । रासस