https://kantipurtv.com/news/2022-08-02/20220802220501.html

खुला विश्वविद्यालयको एक वर्षे बिएडमा नि:शुल्क शैक्षिक कार्यक्रम

श्रावण १७, २०७९

ShareTweet

सामुदायिक विद्यालयका प्राविधिक शिक्षकका लागि खुला विश्वविद्यालयले एक वर्षे बिएडको नि:शुल्क शैक्षिक कार्यक्रम सुरु गर्ने भएको छ । शिक्षा मन्त्रालयको सहयोगमा शिक्षकहरुको वृत्ति विकासमा सहयोग पुर्याउने उद्देश्यले विश्वविद्यालयले नयाँ कार्यक्रम सञ्चालन गर्न लागेको हो । 

शिक्षा मन्त्रालयअन्तर्गत देशभरका ४ सय ८४ सामुदायिक विद्यालयमा कक्षा ९ देखि १२ सम्म प्राविधिक शिक्षाको पठाइ हुन्छ । सिभिल, इलेक्ट्रिकल, कम्युटर, बालीविज्ञान, पशुविज्ञान, इन्जिनियरिङलगायतका विषय पढाउन इन्जिनियरिङ्मा उच्चशिक्षा हासिल गरेका ९ हजार ३ सय ५६ शिक्षक कार्यरत छन् । त्यसैगरी प्राविधिक शिक्षा तथा व्यवसायिक तालिम परिषद् सीटीइभिटीअन्तर्गत ५ सय ७२ वटा सामुदायिक विद्यालयमा ३ हजार ४ सय शिक्षक छन । एकवर्षे बिएड वा १० महिने तालिमको अभावमा प्राविधिक धारका शिक्षकसँग शिक्षण सिकाइसम्बन्धी ज्ञान कमी हुन्छ । शिक्षकको स्थायी लाइसेन्सको अभावमा वृत्ति विकास र स्थायित्वमा समस्याकै कारण उनीहरुको सहयोगका लागि शिक्षा मन्त्रालयसँग सहकार्यमा नेपाल खुला विश्वविद्यालयले एक वर्षे बिएड प्रोफेसनल कोष निशुल्क सञ्चालन गर्न लागेको हो । त्यसका लागि भर्नासमेत आव्हान भइसकेको छ ।

एक वर्षे विएड अध्ययन गर्न चाहनेलाई शिक्षक विद्यार्थीलाई मन्त्रालयले प्राविधिक सहयोगस्वरुप १० हजार रुपैयाँसमेत दिने छ । यसबाट प्राविधिक धारका शिक्षकमा शिक्षण सिकाई प्रभावकारी मात्र नभई वृत्तिविकासदेखि स्थायित्वमा समेत सहयोग पुग्ने छ । सरकारले १० वर्षदेखि प्राविधिक विषयको पठनपाठन शुरु गरे पनि शिक्षकको स्थायित्व नहुने भएपछि धेरैले वीचमै छाडेर जाने समस्या छ । त्यही कारण अहिले शिक्षक अभाव छ ।