https://nagariknews.com/news/42829/

‘६ महिनाभित्रै आधुनिक रेल गुड्छ, ५ वर्षभित्र आफ्नै पानीजहाज चलाउँछौं’

बुधबार, २१ चैत २०७४, २० : ०६ |  नागरिक

काठमाडौं– भौतिक पूर्वाधार तथा यातायातमन्त्री रघुवीर महासेठले ६ महिनाभित्रै नेपालमा आफ्नै आधुनिक रेल कुदाएर छाड्ने दाबी गरेका छन्। 

बुधबार रिपोर्टर्स क्लबद्वारा आयोजित विशेष साक्षात्कारमा बोल्दै मन्त्री महासेठले बढीमा ६ महिनाभित्रै जयनगर–जनकपुर–बर्दिवास–सिमरासम्म रेल कुद्ने स्पष्ट पारेका हुन्। ‘प्रधानमन्त्रीले त दुई वर्षभित्र भन्नुभएको थियो, तर हामी बढीमा अबको ६ महिनाभित्रै निश्चित दुरीमा रेल कुदाउँछौं, जयनगर–जनकपुर–बर्दिवास–सिमरा र सिमराबाट लुम्बिनीसम्म पुर्याउँछौं’, उनले भने।

पूर्व–पश्चिम रेल मार्गलाई पनि द्रुतगतिमा अघि बढाउने बताउँदै उनले थपे– ‘यसको लागि हामीले धेरै डिपिआर बनाईसकेका छौं, कामहरु धमाधम भैरहेका छन्, त्यस्तै उत्तरतिरबाट केरुङ र काठमाडौं, काठमाडौं र पोखरा र पोखरा र लुम्बिनी, हामी लुम्बिनीलाई केरुङ रुट र तराईबाट आउने रुटबाटपनि जोड्न चाहन्छौं, यदि त्यो मात्रैपनि जोड्न सक्यौं भने यसमा दुवै देश भारत र चीनलाई पनि फाइदा छ, नेपाललाई त हुने नै भयो।’

काठमाडौंवासीले ५ वर्षभित्रमा रेल चढ्न पाउने दाबी गर्दै लुम्बिनीसम्म रेल पुर्याउन कम्तीमा पनि ५ वर्ष समय लाग्ने भएकाले यति समय कुनुपर्ने उनको भनाई छ।

नेपालमा कुद्ने रेल भारतको रेल नभई त्यो नेपालको हुने र नेपालमा कुद्छ भन्दै मन्त्री महासेठले सरकारले आधुनिक रेल नै कुदाउने स्पष्ट पारे। ‘तपाईहरुलाई भ्रम नहोस् कि रेलको नाममा जसरी पहिले चल्दैथियो त्यसलाई नै डेन्टपेन्ट गरेर होइन, हामी आधुनिक रेल नै चलाउँछौं’, उनले भने।

‘५ वर्षभित्र पानीजहाज चलाउँछौ’

मन्त्री महासेठले पानीजहाज चलाउनेबारे पनि होमवर्क भैरहेको जानकारी गराए। ‘पानीजहाजको बारेमा पनि होमवर्क सुरु भइरहेको छ, गंगा नदीलाई हामीले प्रयोग गरेर, नेपालको आफ्नो पोर्ट हामी बंगलादेशमा राख्न सक्छौं, भारतमा पनि राख्नसक्छौं, हामी लिजमा राख्नसक्छौं, जसरी जयनगरको रेल–वे स्टेशन छ, भारत सरकारसँग हामीले १०० वर्षको लिज लिएर चलाएका हौं, त्यस्तै भारत सरकारसँग हाम्रो द्धिपक्षीय सहमति भयो भने कुनैपनि ठाउँमा हामी आफ्नो पोर्ट बनाउन सक्छौं, त्यस्तै बंगलादेशसँग पनि सहमति भयो भने हामी बनाउन सक्छौं, हाम्रो नजिकमा अहिले दुई वटा छ, एउटा कोलकत्ता बन्दरगाहा र विशखापटन छ, त्यो भन्दापनि नजिक कहाँ छ, यो सरकारले ५ वर्षभित्र पानीजहाजको पनि व्यवस्था गर्छ, त्यो पनि नेपालको झण्डा राखेर र आफ्नो पोर्ट बनाएर सरकारले पानीजहाज चलाउँछौं, तपाईहरु ढुक्क हुनुहोस्’, मन्त्री महासेठले आश्वस्त पारे।